R小姐的部落格

上星期五Walk in，點知佢話無位！打去荔枝角個間，話得一個位，最後食唔到><

即刻book今個星期五食返。

佢係金巴利道，下面擺左個位係SALE韓燒，你望上樓梯以為佢係飲酒既地方！

坐低，已經有一鍋！你就可以點野食喇！一隻定半隻雞，

因為我地諗住試下，所以我地就叫左半隻先！

佢比左半隻，叫我地倒左落去先，再調轉個沙漏。

之後個店員哥哥話我地知如果加左會員就可以有個椰青送。(每個人都可以申請，我地四個就有四個椰青)

煲入面一打開好香椰味﹐好清新啊！

雞好正，雞味好濃，個湯就咁飲唔算重椰青味，反而如果你食竹苼個陣，佢吸晒啲椰味，好香。

就咁飲就唔算太濃(我地叫左竹苼椰子鍋，貪竹笙耐煮。^^)，個湯好甜，我個人認為佢係有加糖既！

因為R小姐家中都常煲椰子湯，就算飲椰青水都無咁既甜度。

P.S. 佢有Wifi,無記錯密碼就係佢地個電話號碼！

椰青水：

夠冰凍，清涼，好好飲！我個椰青係幾清甜的。

海綿寶寶：

其實就係魚肉入面有芝士粒，我個人覺得唔錯！

本身唔太喜歡咩芝士丸啊個啲，因為入面啲芝士實在唔好食，

呢隻唔算好濃，混合一齊食幾好食，幾脆同彈，唔錯。

竹笙：

佢鍋入面得三四條竹笙咋！唔夠食啊！

點知黎個碟都唔係好多，但廿幾蚊，OK啦！

洗得幾乾淨，索湯真係超正，大家相得益相彰！

本身椰子味唔算極香，但食竹笙個陣反而椰子味好濃！正！

玫瑰花豬肉(人地個名靚啲)：

一邊有成6-8塊，肉味唔算好突出，

勝在唔鞋！都可以一試。

帶子：

剖半之後覺得佢細左好多，我個人就鐘意厚肉，咬落去好滿足，

鮮味一般，可叫可唔叫。

娃娃菜：

今次既都幾甜，但佢一棵度架咋！廿幾蚊啦！

抵唔抵就你諗你喇^0^

響玲：

必食的，就唔講太多。都係索湯配料黎！

夠脆，香口欠奉。

日本豆苗：

上枱個陣真係嚇一嚇，第一次連根上，

剪左佢扔晒落去，快啲撈起，

少少草青味，但我接受到，細細條，有啲脆，甜度都有少少，

總之唔係你食開既菜苗，口感似沙律或伴菜啲苜蓿芽。

墨汁墨魚丸：

落到鍋內，啲蟹籽所餘無幾，有啲浪費！

好黏，少少彈牙，但味道算幾好既。